Bertso berriak Txus Martini jarriak

Atzo kandela gaua izen zen Zaballako espetxe aurrean Txus Martin eta gaixo dauden beste 13 presoen askatasuna beste behin aldarrikatzeko.

Julen Zulaika bertsolariak preso gaixoen inguruan kopla ederrak egin zituen biok kantatzeko, Alfonso Sastre-k bere espetxealdian alabari kantatzeko erabilitako doinuarekin. Nik, berriz, Txus Martini jarri nizkion bertsoak, bere anaia Joseba-k emandako hainbat bizipen kontatuz. (Eskerrik asko Koldo!).

Txus eta hamalauentzat egun bat gehiago espetxean, gaixotasuna egun bat gehiago areagotzen delako: #14akherrira orain!

Doinua: Orioko balearena

-1-

Presoen egoera

gogora ekartzean,

neska-mutil bat dago

kasu bakoitzean,

gaur ezagut dezagun

bertsoz kantatzean,

nor dagoen Txus Martin

izenan atzean (errep.)

-2-

Haurtzaroa Basaurin

jaio ta haztea,

gogoa irribarre

ta ilusioz betea,

eta oroitzapen bat

benetan maitea,

anaia ta aittitegaz

mendira joatea (errep.)

-3-

Behin ura hartu gabe

txangorako irten,

beroaz hasi ziren

halakoren baten

aittiteren zahatotik

ardoa edaten

ta lehenengo atxurra

harrapatu zuten (errep.)

-4-

Bi umeak harrika

aittiten atzetik

ta gero izkutatu

korrika kolpetik,

barreka ari ziren

gustura gogotik,

hobe ixiltzea aittite

hasarretu aurretik (errep.)

-5-

Animaliak ezin

ikusi ondo ezik,

haientzat maitasuna

larregia kasik,

eta ez zekien falta

inondik babesik,

etxera eroaten

zituen poz-pozik! (errep.)

-6-

“Txarli” belatz-kumea

politta osoa,

pixka bat bihurria

baina graziosoa,

behin jan bila hozkailura

hark eman pausoa,

ia bertan izoztu

zen txori gaixoa! (errep.)

-7-

Ume zoragarria

gero gazte egin zen,

ta herrigintzan hasi

zen laster murgiltzen,

Jarrai ta Kimuak-en

bazterrak astintzen,

bihar gure zelaiak

loratu daitezen (errep.)

-8-

Larogeitahamalaua

iluna urtea,

gehien maite duzuna

atzean uztea,

ez da erraza herri-

minari eustea,

noiz arte jakin gabe,

agur esatea (errep.)

-9-

Ta sasian denbora

badoa ihesi,

herriaz behin ta berriz

eztabaidan hasi,

gaitzerdi kideekin

euskara ikasi,

itzaletan bada ere,

behar dugu bizi! (errep.)

-10-

Etxekoentzat egunak

kontatzen hastea,

zerbait noiz gertatuko…

ta  itxarotea,

Frantzia sarekada

baten albistea,

Gaur tokatu zaigu Txus

atxilo ikustea… (errep.)

-11-

Isolatuta egon

ondoren zortzi urtez,

txoria txori baina

ze kate astunez…

gogoa ta bihotza

pentsamendu ilunez,

zertarako kantatu

ta inork entzun ez?

-12-

Ez badugu ateratzen

Txus horko espetxetik

eta beste guztiak

gero bere ondotik,

denok izango dugu

bihotzan erditik,

min bat ez dena joango

inoiz gure herritik (errep.)